في ثورستان
بعد ما رحل على بابا و الاربعين حرامي , قعد باب المغارة محلول. بطبيعة الحال الناس الكلّ بعد ما كانت تقول خبز و ماء و علي بابا لا, و لّات تصيح افتح يا سمسم ...
الّي هذا يقول افتح يا سمسم اغلق يا سمسم اغلق افتح افتح اغلق لين هاك الباب عدم و قعد محلول مبّزع
عمّت السرقة و الفوضاء في المغارة و الناس الكلّ بعد ماكانو متكاتفين متوّحدين كلّهم يدّ و حدة كيف طرّدو على بابا و الاربعين سارق و لّاو ياكلو في بعضهم ماكلة. كلّ و احد يجبد ليه .
جاشي عمّي الراجحي السمح في يدّو النوّار و قاللهم :
يا شعب الّه المختار نعرف ثقافة على بابا تأصّلت فيكم و تغلغلت في اعماقكم. انا مستوعب حالتكم النفسية لكن كيف ما خرّجتو على بابا من ارضكم فعندي فيكم الثقة بش تخرّجو الذكريات البائدة من مخاخكم و بش تنساو الممارسات الّي تربيتوا عليها طيلة الثلاتة و عشرين الّي فاتت, كيف : التلهميق والوساطة و الرشوة و الطحين و السرقة و النفاق والانتصاب العشوائي في كلّ حالاته سواء في الكار و الّا في التروتوار...
نعرف و راس بابا نعرف الّى موش ساهل بش تتفطموا في نهار و ليلة امّا راهو لازم تفهموا انّوا الشيء هذا اليوم ممنوع ممنوع ممنوع و راس نانا بالحقّ مانيش نفذلك , و انا من جهتي بش نعاونكم على الشفاء من ادمان التشوليح و التجوبير هاو بش نعمل تعديلات في جهازي الامني و بش نحاول نعمّرهم على مود : سايس خوك
ها توا نعطيهم فرودا بلاش كرتوش و الغاز المسيل للدموع تو نبدّلوه ريحة زطلة هكّاكة الناس الكلّ تهدى و ترّوح لديارها شايخة, و في عوض الماتراك تو نحطّلهم بين يديهم حاجة تكون اكثر ليونة تنحّيلهم الستراس, ماو هوما زادا لازمني نفطمهم وحدة وحدة
الناس الكلّ و لاّت تصيح:
يا راجحي انت الرجل المناسب في المكان المناسب, انت رمز التحدّيات, الّله أحد و الراجحي ما كيفو حدّ
كيف ما عملو مع رشيد بن عمّار و كيف ما كانوا يقولو لعلي بابا.
...نفس الشعارات الجوفاء ... الّله غالب , شعب طفّــــــــار و ما ينجّمّش يعيش بدون زعامة, ما عندوش الثقة في روحو تربّى على التواكل و الاتكّال .
كاهو عاد
تنّجموا تتصوّروا اش عملوا اهل ثورستان في هاك المغارة , ناس تبني في الديار داخل المغارة, ناس تنهب, ناس تغتصب و ناس تصيح كيف ترى بوليس متعدّي : و عليّا و عليّا بوليسنا كيف قبل عندو الكرتوش في الفرد متاعو. ما تبدّل شيء ما تبدّل شيء
, وعباد قعدت عائشة على و هم اطياف الاربعين حرامي. و ين تتلفّت تراى خيالاتهم ... الناس الكلّ دخلت فيها غولة ... طرنطو فراقو صعيب علي بابا ... الناس الكلّ تحب تقطع مع الماضى و حتّى حدّ ما بدا يكنس قدّام دارو
هوما هكّاكا هايجين مائجين ,اليّ يبني و الّي يهدّ و الّي ينقب و الّي يفلّق في هاك المغارة, يخرجلهم من قلبها سي القائد باجي سبسي
سي الباجي كان في سبات عميق منذ ثلاتة و عشرين سنة . و قت ملك البلاد أحيل على التقاعد هرب سي القائد للمغارة وقعد راقد حتّى لين صوت الحفران و النقبان متاع المتعمّشين فيّقوه
قام من النوم ينفض الغبرة من عليه و يصيح : بورقيبة بورقيبة هيبة الدولة هيبة الدولة
يجريلو سي الراجحي يبخّو بشّوية ماء و يشرّبو كاس زهر و يقعد يحكيلوا اش صار المدّة هاذي الكلّ.
سي الباجي يقلّوا : ما تخافش يا بنّي تو كلّ حاجة ترجع كيف ما كانت قبل, انا الّى بش نرّجعلكم هيبة ا لدولة
برّا انت ولدي شوف عباد اخرى تفهم الرقّة و الحنان متاعك و ا نا جيبلي هاك الصيد و خلّيني راس راس معاهم و بقدرة ربّي العصا تجيب.
يحجّم لحيتو سي القائد يحطّ الحطّة و يخرجلهم
اسمعوني مليح , يا شعب ثورستان
المغارة مغارتكم و خيراتها الكلّ ملككم, لازم الناس الكلّ تشدّ الصفّ و تتنظّم و انا تو نوّزع الثروات بالتساوي و للجميع,
لكن عندي شرط واحد, حتّى حدّ ما يقرب لشجرة الهندي , هذيكا شجرة هيبة الدولة, تعمل الاعتصام و الّي يمسّها بش يتعاقب
اعملوا الّي تحبّوا كولو غنّيوا اسكروا عبّروا تمقعرو نبّروا لكن ما تقريوش لهاك الشجرة
ما تمسّوش ثمرة الهندي المحرّمة, راهي يدّق.
شعب ثورستان كيف ما تعرفو عينه و لّات محلولة و لّا حروجي كلمتين خوات معاتش يطيقهم و لّا شعب فايق و حسّاس و كيف ما يقول المفكّر العظيم : ناي خليقة و العوج ما نطيقا
هوا قال هاك الشجرة ما تتمّسش و الثوريين الكلّ نقّزوا عليها, خاطر في اعتقادهم حتّي شيء في الدنيا ما ينّجم يكون اقوى من علي بابا.
لكن هيهــــــــــــات
ما يعرفوش جماعة اهل الكهف كيفاش كانوا قبل و على انا عصا تربّاو.
الّي يتشدّ يتشعبط يسيّب عليه القائد الباجي الصيد يمشمش دين والديه.
و الّي ياكل الهندي و يعتصم يستعملو معاه اساليب تسريح الخنادق و شتّى انواع التسليك المعهودة و ما الخ من اساليب فنّية متاع ما قبل التاريخ البن عليني يا بمبك.
ايّا سيدي
نهار من نهارات الصيد طاح بيوسف باتريوت و ياسين عيّاري واقفين قدّام شجرة الهندي. يجبدهم الزوز من شعوراتهم و يكركرهم من الشجرة حتّى لقلب المغارة اين يقبع السبسي
السبسي يقلّهم :
فاش تعملو قدّام الشجرة ؟
يتبع
oeuvres d'arts