Folies Artistiques

تخلقلي  جوانح و تطيرني

بيها  كنت نسافر الفوووووق

وراء السماء

نبوس  ربّي و نعنّق احلامي

ونوشوش  حكايات النجوم في قلوب احبابي

مابين غصرة المخاض و لذّة الولادة

تفسخني

 و المعنى يعاود يرسمني

كانت الكلمة تعاود تخلقني

 تغسلني و تجددني

الكتيبة  كانت جنتي

و تقلبت لحكاية

كتيبتي  تحنطت

كلماتي  يبست و تشققت

ما لقيتش كيفاش نسقيهم

ما لقيتش باش نرويهم

نتعارك  معاهم الف مرّة و ما يخرج من الحلق كان

الحاء

ونغزل  معنى

نحب  نزرع نجمة ونوارة في قلوبكم

نحب  نسمع صوتي في تنهيداتكم

نسكت

نتغصور

 و نشدّ القلم ومحسوب بش نكتب

لكن

نجمتي تطفي قبل ما نزرعها

يدي  ترعش الف مرّة قبل ما تحفر الكلمة

نتلفت ورايا

و يتعدى خيال زمان قدامي

تصاور كحلاء بيضة تبهتني و تسكتني

تصدعني  قهقهة الدنيا 

والزمان  يقلّي

ونستسلم  للسبات

نرقد  و ما نحلمشي

تعبت

الدنيا غلبتني

سرقتلي  كلامي

سرقتني

الحقيقة  جمدتني و غلّفتني

التعثيرة  فيقتني و خدرتني

 والصمت سكنني

ننفظ  ترابي و نقوم

نكتب

و ما نحفر كان اسمي

 و سبعة  نقاط  تعجّب